WATOAJI WA CHANJO YA HPV KATIKA HALMASHAURI YA WILAYA YA MAFIA WAPATIWA ELIMU

Posted on: April 20th, 2024

Wasichana 4826 wilayani Mafia wanatarajiwa kupata chanjo ya Saratani ya Mlango wa Kizazi (HPV) itakayotolewa kuanzia tarehe 22 hadi 24 Aprili, 2024.

Kuelekea zoezi hilo, Halmashauri ya Wilaya ya Mafia kupitia Ofisi ya Mganga Mkuu wa Wilaya imeongoza mafunzo kwa watoaji chanjo ikiwa ni sehemu ya maandalizi.

" Tumepita maeneo tofauti ikiwemo maeneo ya ibada pamoja na shule ili kuhamasisha jamii kuhakikisha tunapata walengwa wote ambao ni wasichana wa umri wa miaka tisa (9) hadi 14.

Niwaombe wazazi na walezi kuwaleta wasichana katika vituo vya kutolea huduma ili wapate chanjo kwa wakati lakini pia tutapita kwenye shule na maeneo yote yaliyo magumu kufikika" alisema Alfred Ngowi, Muuguzi Mkuu wa Mkoa wa Pwani.

Zoezi la utoaji chanjo ya Saratani ya Mlango wa Kizazi (HPV) inatarajiwa kutolewa kwa walengwa 147648 katika mkoa wa Pwani.