WAZIRI BASHUNGWA AWEKA JIWE LA MSINGI MRADI WA ELIMU NA KUZINDUA MRADI WA AFYA

Posted on: October 26th, 2024

Waziri wa Ujenzi, Mhe. Innocent Bashungwa ameweka jiwe la msingi ujenzi wa shule mpya ya sekondari Raphta pamoja na kuzindua zahanati ya Kilindoni ambazo zote zipo katika kata ya Kilindoni. 

Mhe. Bashungwa amefanya uzinduzi pamoja na kuweka jiwe la msingi katika miradi hiyo leo Oktoba 26, 2024 wakati wa ziara yake wilayani Mafia.

Ujenzi wa shule ya Raphta unatekelezwa na Serikali kupitia mradi wa SEQUIP awamu ya pili kwa gharama ya Shilingi Milioni 528.9 kwa kujenga vyumba vya madarasa nane, matundu ya vyoo nane, maabara tatu, jengo la utawala, ofisi ndogo moja, maktaba na jengo la TEHAMA.

Miradi hiyo ya Afya na Elimu imeshaanza kutoa huduma kwa jamii pamoja na inasaidia kupunguza umbali kwa wagonjwa kufuata huduma za afya pamoja na wanafunzi kufuata masomo.

Mhe. Bashungwa, alipata nafasi ya kutembelea na kukagua hatua za ukarabati wa kivuko cha MV Songosongo ambacho kipo kwenye matengenezo, ambapo amewahakikishia wananchi wilayani Mafia kuwa Serikali inaunda timu ya wataalam ambayo itafanya kazi usiku na mchana kuhakikisha wanarejesha huduma za vivuko ( MV Songosongo na MV Kilindoni ambavyo vimeharibika )haraka iwezekanavyo.