HALMASHAURI ZASISITIZWA KUTENGA BAJETI KUKABILIANA NA MABADILIKO YA TABIANCHI

Posted on: January 24th, 2025

Ili kukabiliana na mabadiliko ya tabianchi, haina budi kushirikiana vyema kuhakikisha kuwa utekelezaji wa mipango madhubuti iliyowekwa unatimia.

Serikali, wadau mbalimbali pamoja na wananchi wana wajibu mkubwa kuleta mabadiliko katika jamii kwa kila upande kutimiza wajibu.

Kwa kuzingatia hayo, Ofisi ya Rais, Tawala za Mikoa na Serikali za Mitaa kwa kushirikiana na Shirika la Umoja wa Mataifa la Mitaji ya Maendeleo ( UNCDF) linafanya kazi katika kujenga uwezo kwa halmashauri za wilaya nchini kuwa na uelewa wa masuala ya mabadiliko ya tabianchi pamoja na kusisitiza umuhimu wa halmashauri kujumuisha masuala ya mabadiliko ya tabianchi kwenye mipango na bajeti.

Akizungumza na Timu ya Wataalam wa Halmashauri leo Januari 24, 2025, Mratibu wa Mradi wa Mabadiliko ya Tabianchi kutoka Shirika la Umoja wa Mataifa la mitaji ya Maendeleo ( UNCDF- LoCAL) Bi. Aine Mushi, ameelezea umuhimu wa kushirikisha wananchi katika kuibua masuala mbalimbali yahusuyo mabadiliko ya tabianchi pamoja na kutekeleza mipango iliyowekwa  ili kuyapatia sulushisho la kudumu.

Halmashauri ya Wilaya ya Mafia ni miongoni mwa halmashauri ambazo zinatarajia kupokea kiasi cha Shilingi Milioni 507 kutoka UNCDF ambazo ni sawa na Dola 200,000 ili kukabiliana na mabadiliko ya tabianchi.

Shirika la UNCDF linafanya kazi kwa ukaribu pamoja na Ofisi ya Makamu wa Rais na  taasisi nyingine za Serikali ikiwemo Baraza la Taifa la Hifadhi na Usimamizi wa Mazingira ( NEMC).