MILIONI 428 KUTOLEWA KWA WANUFAIKA WA VIKUNDI VYA MIKOPO YA ASILIMIA KUMI

Posted on: January 17th, 2025

Halmashauri ya Wilaya ya Mafia kupitia Idara ya Maendeleo ya Jamii leo Januari 17, 2025 imeongoza mafunzo kwa vikundi vya Wanawake, Vijana na Watu wenye Ulemavu vinavyotarajia kupata mkopo wa asilimia 10. 

Mafunzo hayo yaliyofanyika katika ukumbi wa Halmashauri uliopo Chicco pamoja na Chuo cha Ufundi Stadi (VETA) kilichopo Ndagoni, yamekutanisha vikundi 57 kutoka kata nane wilayani Mafia. 

Akifungua mafunzo hayo, Kaimu Mkurugenzi Mtendaji wa Halmashauri ya Wilaya ya Mafia Dkt. Seleman Kataga amewataka wanufaika hao kuhakikisha wanakuwa waaminifu katika urejeshaji pamoja na kutumia fedha watakazopewa kwa lengo lililokusudiwa. 

Aidha, amewataka wafikishe ujumbe kwa waombaji wengine kuwa "  wale waliokosa wasikate tamaa maana zoezi ni endelevu,  nao watapata nafasi nyingine ya kuomba pindi dirisha la pili litakapofunguliwa" alisema Dkt. Kataga. 

Kwa upande wake, Mkuu wa Idara ya Maendeleo ya Jamii Bi. Asha Itelewe amewasisitiza wanufaika kuhakikisha kuwa wakati wakipambana kufanya marejesho, wasisahau kubadilisha hali zao za maisha pamoja na familia zao maana lengo la kutoa mikopo hiyo ni kuwainua wananchi kiuchumi. 

Bi. Itelewe ametoa wito kwa vikundi vilivyokosa kuendelea kuomba mkopo wakati Halmashauri inajiandaa kufungua dirisha la pili mwishoni mwa mwezi Januari mwaka huu 2025. 

Mafunzo hayo yanatarajiwa kumalizika kesho Januari 18, 2025.