MKUTANO WA USHIRIKISHWAJI WA WANANCHI KATIKA UHIFADHI WA BAHARI NA MAENEO TENGEFU

Posted on: July 4th, 2024

Ili bahari iweze kutupatia manufaa, kuna umuhimu mkubwa wa kutunza vitu vilivyomo ndani yake vikiwemo nyasi bahari, matumbawe na mikoko ili viweze kutupatia rasilimali hai.

Kwa kuzingatia umuhimu huo,Taasisi ya  Uhifadhi wa Bahari na Maeneo Tengefu Tanzania kwa kushirikiana na wadau mbalimbali wakiwemo Shirika la Uhifadhi wa Mazingira Duniani (WWF), The University of Queensland na Coral Reef Rescue Initiative, wameandaa Mradi wa Kuokoa Matumbawe unaolenga kujenga taasisi, mifumo na miundombinu ya kuweza kusimamia na kuokoa matumbawe.

Akizungumza wakati wa mkutano wa ushirikishwaji wa wananchi na ngazi mbalimbali za Serikali Wilayani Mafia, Mkuu wa Wilaya ya Mafia Mhe. Aziza Mangosongo amemshukuru Mhe.  Rais Dkt Samia Suluhu Hassan kwa kuipa kipaumbele sekt…

Samia Suluhu Hassan kwa kuipa kipaumbele sekta ya mazingira nchini pamoja na kutoa wito kwa mashirika binafsi kujikita katika utunzaji wa mazingira.

Kwa upande wake, Mratibu wa Uhifadhi katika Hifadhi za Bahari na Maeneo Tengefu ambaye pia ni Mratibu wa Mradi wa Uhifadhi wa Matumbawe, Ndugu Godfrey Ngupula, ametoa wito kwa jamii kutoa ushirikiano mzuri ili kuweza kufikia lengo la mradi.

" Kuanzia viongozi wa juu, wataalam, wanasheria, Halmashauri, wafanyabiashara na wananchi wote kwa pamoja tuweze kuzungumzia hali ya matumbawe na kuhakikisha tunayahifadhi; kwa kuzingatia ripoti zetu Mpango Mkakati wa Kitaifa tulionao tunaenda kuona nini kifanyike kama jamii ili tuhakikishe rasilimali zinatufaa" alisema Ndugu Ngupula.

Wavuvi, wachakataji samaki  pamoja na wakulima wa mwani wamepongeza kuwepo kwa mradi huo wilayani na kuweka nia ya kushirikiana na Serikali katika kutunza mazingira, hasa matumbawe ili kuendelea kunufaika na rasilimali za baharini.

" Tunaishukuru Serikali kwa kuwa mstari wa mbele kuhifadhi mazingira na kutuwezesha wavuvi na wakulima wa mwani kufanya shughuli zetu, elimu hii itatusaidia kufanya kazi zetu kwa ufanisi mkubwa" alisema Issa Kombo, mvuvi na mchakataji wa samaki.

" Natoa wito kwa wavuvi wenzangu kupokea elimu hii na kuifanyia kazi, wenzetu wanatuletea mradi ambao ni wa muda mfupi lakini uvuvi ni endelevu, hivyo sisi tuna jukumu kubwa kutekeleza tuliyojifunza" aliongeza Kombo.

Mradi huo unaofadhiliwa na Shirika la Mazingira Duniani ( GEF) utatekelezwa kwa miaka minne katika nchi saba ikiwemo Tanzania; nchi nyingine ni Madagascar,  Indonesia, Philippines, Salomon Islands, Fiji na Cuba, ambapo katika awamu ya kwanza ya mradi, nchi sita zitaanza utekelezaji ikiwemo Tanzania.

Zaidi ya asilimia 25 ya aina za samaki duniani zinapatikana kwenye matumbawe huku zaidi ya asilimia 70 ya uvuvi mdogo nchini Tanzania unafanyika kwenye matumbawe, hivyo ni muhimu kuyatunza ili kunusuru uvuvi na shughuli nyingine baharini zikiwemo ukulima wa mwani na utalii kwa manufaa ya jamii na Taifa kiujumla.